كيفاش تداوي السمّ بالسّم

Manifestation 27 Décembre a Tunis. FETHI BELAID/AFP

نبداو الحكاية متاعنا بشويّة "ركوب" على الثورة ،

ثورة الكرامة و الحرّيّة لي اهمّ شعاراتها شغل حريّة كرامة وطنيّة لي تجي بعدها بالضبط الصّرخات  الديقاجيّة الشهيرة و كل ما يترتّب عنها من تحوّلات سوسيو بسيكولوجيّة لازم الاخصّاء ينضرو فيها.

نبداو بالشّغل الذي يتبوّأ مكانة هامّة في النضّرة  الاستشرافيّة للابعاد التّنمويّة لدولة المؤسّسات و القانون حسب راي النّظام السابق

آش عمل سي النّظام السابق هذا ؟

ياسيدك بن سيدك سي النظام السابق عمل تخطيط واضح ماكانش ناجح ياسر و الدليل نسبة البطالة لي تخبط في 20 بالميا في تونس الكل و حتى 40 بالميا في المناطق المحقورة (لا للحقرة) .

سي النظام هذا كان يجيب في المستثمر الاجنبي من غير ما يدفع حتى فرنك ضرائب وقتلي الدستور القديم يقول انّو اي فرطاس موجود على هالارض هاذي لازمو يشارك في الخزينة العامّة .

كنا نتبّعو في مخططات صندوق النقد الدولي و البنك العالمي لي بيناتنا يحبّو ياسر الشّعوب و يعملو في التنمية  و المثال في افريقيا تيلمون عملو تنمية لين ماعاتش ثمّا مجاعة جملة من غير ما يخمّموش في الرّبح جملة.

سي البنوك هاذي في حكم بورقيبة بعد فشل تجربة التعاضد و بمساعدة الوزير لي يفهملها ياسر الهادي نويرة  بلّعونا معاهم في هم قروضات و واضح ماصارتش تنمية امّا شنوّة وقتها اقترحو خفض المصاريف العمومية باش قال شنوة الدولة تنجّم تخلّص القروضات و مالمصاريف هذيكا الدعم على الخبز  و الفارينة و المقرونة و بقيّة الحكاية تعرفوها شنو صار في 1984

انتفاضة الخبز لي رسميّا مات فيها 600 تونسي اما في الحقيقة ممكن في دورة 2000 شهيد .

هاذي هيّا اقتراحات الخبراء العالميين لي قاريين باك + كمشة و يفهمولها ياسر،

و كي جا المخلوع ورث الاستراتيجيّة و كمّل على نفس المنوال و كان محمّد الغنّوشي لي قالو نضيف و خاطيه  هو المسهول على لجنة الخوصصة لي طلب صندوق النهب الدولي احداثها في تونس باش تخوصص لي بناتو الدولة البورقيبية بعد الاستقلال و تفرّقو على الجماعة باسوام رمزيّة و الشطر الاخر لراس المال الاجنبي
هذا الكل و سي البنك هذا يشرط "سياسة الحوكمة الرشيدة" يعني عندهم كي نبعزقو ملك الشعب حوكمة رشيدة..
هذي هي سياسة التعديل الهيكلي لي تفرضها البنوك هاذي كلّ ما تعطيك قرض و من غير ما تدرس الواقع متاعك يعني بكلام اخر السياسة الاقتصادية متع بلادك تتسطّر موش في قرطاج امّا في واشنطن.

و كيفما كان يقول المخلوع حرفيّا في الاجتماعات حسب مصادر موثوقة كي يسألوه على الاقتصاد : "آني ما نفهمش في الاقتصاد اعملو لي تقول عليه البونك منديال" و نخليلكم راحة تخيّلها بالصوت الجهوري الزعبعي !

بجاه ربّي كيفاش تحكيلي على كرامة وطنيّة و لا سيادة على الارض هاذي الّا للدوائر الماليّة الاجنبيّة التي ينطبق عليها المثل القائل ما ثمّاش قطّوس يصطاد لربّي؟

في نفس الوقت، كلّ ما تجي تحكي على المشكلة هاذي, يقوللك منين تفهم منّو انتي الاقتصاد, هذا علم اللّدنّي يقارب اطلاق الصوارخ تعقيدا، خلّي الخبراء لي يفهمولها يحكيو.....

هوما ما فهموش لي سي الخبراء لي يحكيو عليهم، هوما بيدهم بنادريّة المعجزة الاقتصادية التونسية في وقت الزعبع و قيادته الرشيدة لي قضات على الفقر و البطالة.
 صحيح موش كل الخبراء بايعينها بلفتة امّا يلزم نفهمو لي كلّ خبير عندو اتّجاهات سياسيّة معيّنة : ثمّا خبراء بن علي لي يثمّنو في الخيارات الصائبة و خبراء البنك العالمي لي قالو في تقرير 2010 انو تونس امورها عال العال و ثمّا الخبراء لي كانو يقولو عليهم يصطادو في الماء العكر و يشوّهو في صورة تونس هاذم هوما لي يغزرو لواقع البلاد بالرسمي و هوما لي توّة ضدّ المديونيّة .

في البلدان "المتقدّمة" حتّى لوكان حكوماتها تاعبة و ما عندها حتى علاقة بمشاكل الشعب, كيف حكومة اليونان, يصير حوار وطني على الحكاية هاذي. انا ما نحبش  نفرض في رايي بالسيف، اما على الاقل ندعو لوعي شعبي بخطورة المسألة هاذي وتبعاتها: و هنا يجي دور الاعلام و الاحزاب "الديمقراطيّة" على خاتر من غير اسقاط دكتاتورية المديونيّة و بناء اقتصاد وطني موجه للتشغيل و التنمية الحقيقة موش تنمية النوفمبرية ما ثمّاش ثورة و ما ثمّاش تشغيل، و يقعد الاقتصاد في خدمة البانكاجيّة العالميين موش في خدمة الشُّعب.

و ها الاحزاب لي حالّتلنا في الجنّة ذراع فهّموني كيفاش باش تعمل حتى ربع برامجها و كاسة الحاكم فارغة و و شطر الميزانية ماشية في ترجيع الديون لي كان بخدمة قانونية باهية عندنا الحق نطيّحو اغلبها خاتر خذاها بن على من غير ما يستفاد منها الشعب و ماناش اول عباد نطيحو ديوننها و ماناش لخرانين و قتلي فرد وقت سي لياس الجويني يقول لي مالازمناش نقصو على ترجيع الديون على خاتر يولّيو ما يسلّغوناش مرّة اخرى.

و هنا فهمنا كيفاش تداوي السّم بالسّم، كيفاش تداوي الاضرار لي تسبّت فيهم القروضات لي معاها هيمنة و نهب و بقروضات اخرى و نهب اخر و هيمنة اخرى.

و نقطة النهاية لهذه النشرة نختمها بمقولة العلّامة الشهّير شيخ صفحات الفايسبوك : سلام على شعبنا وانّها لثورة حتّى النّصر !

بقلم العبد للّه  و حسام العريف