على خاطر.. على خاطر و على خاطر

على خاطر سمير الفرياني عندو ولاد في الدار يستناو فيه

على خاطر سمير الفرياني عندو مرتو متحيرة عليه

على خاطر سمير الفرياني عند أمو مقهورة عليه 

على خاطر دم الثورة جرى في عروقو

على خاطرما قدمش مصلحتو على مصلحة البلاد

على خاطر ما عرف كان درابو فيه نجمة وهلال

على خاطر الثورة هاذي رينا منها كل عجب

رينا عبد ممسخ يترقى و الي قال الحق جاو شالوه

على خاطر المحبوس يعدي عليه الليل و ما يطلعش عليه نهار

على خاطر المحروم و المقهور و اللي شاعلة في جواجيه النار

على خاطر توانسة قلبهم كبير وما يرضاو يعيشوا كان احرار

على خاطر شعب ضاقت بيه الدنيا وما لقى بها وين

على خاطر حرية التعبير نلوجو عليها عندنا سنين

على خاطر التونسي روحو غالية و دمو ما يتشراش بالذهب

على خاطر كمشة مسامر مصددة تمررلنا في عيشتنا

على خاطر ما يلزمش الظلم يرجع و الخاين يجيه نهارو

على خاطر بكلنا نستناو وقتاش سمير يرجع لدارو

على خاطر.. على خاطر و على خاطر...على خاطر.. على خاطر

على خاطر هذا الكل هو تكلم و أنت.........سكتت

لكلنا سمير الفرياني.. الحرية لسمير الفرياني

يا شعبنا يا مكبوت

Date de publication jeudi 26 mai 2011, 14:20


يا شعبنا يا مكبوت يا شعبنا يا بهيم يا شعبنا يلي ما تعرفش مصلحتك يا شعبنا يلزم ثمة شكون يحكم فيك ثمة شكون وصي عليك معندكش مخ بش تخمم.


بعد ثورة الكرامة إلي قامت بش تثور  عالفساد و على قمع الحريات و منها حرية التعبير جات ليوم ثلة من المحامين بش تطيحلنا كل شي في الماء و هاذوما حسب رأي ما فهمو شي من الثورة بعد ما كان أحد شعاراتها "حريات حريات" .


نفسرلكم: قررت المحكمة إلزام الوكالة التونسية اللانترنات بغلق المواقع ذات الطابع الإيباحي بعد القضية الاستعجالية إلي رفعوها 3 محامين


http://www.mosaiquefm.net/index/a/ActuDetail/Element/14538-Le-tribunal-de-premi%C3%A8re-instance-ferme-les-sites-pornographiques.html


   . نحب نسألهم هالمحامين الثورجيين وين كانو قبل ؟ علاش ما رفعوش قضية في زمان عمار 404؟ أما أبجل البرنو ولا محاسبة إلي قتلو ولدنا وسرقو بلادنا ؟ ولا الرجولية حالة عشوائية تتغير بتغير الأوضاع ؟ هل  ياسر خايفين على الشعب لا يشوف مشاهد منافية للأخلاق تقول ما كان حد يتفرج قبل, ومزروبين إلي يعجبك فيهم.


http://espacemaghrebin.blogspot.com/2011/05/blog-post_6355.html


قضية المواقع قبل كل شي قضية عقلية يلزم المواطن يفهم إلي هو مسؤول و إذا متحطش في موقع المسؤولية و ديمة ثمة وصاية عليه كيفاش تحبوا يتعلمها ؟


صحيح هالمواقع فيها خطر على الناشئة والولاد الصغار و هنا يظهر دور الأب بش يأطر ويعرف ولادو فاش تعمل على الأرديناتور وفرصة بش يدخل الفضاء الرقمي و ما يبداش ضايع فيها قدام ولادو وبعد يقول ما عادش نفهمهم وملة جنراسيون و هات من هاك اللاوي.


الحل كان تجيو تشوفو مطروح "سليم عمامو" إلي كان كاتب الدولة صرح بيه ليه مدة:


http://www.youtube.com/watch?v=qZ5VM3KHCWg


 الحل: ما عادش فما حكومة تراقب الأنترنات أما يوليو المزودين كيما بلانات وتوبنات و جلوبال نت  يقدمو خدمة الحجب للمستعملين وكانك على الإمكانيات التقنية راهي متوفرة عند الوكالة من أيام المخلوع.


نحب نذكركم إل الحجب أيامات بن علي زادة بدا  مع المواقع الإباحية و بعد هاو متطرفين..هو يمس من سيادة الدولة..هاو يحب يدخل البلاد في حيط و هكا سكتو الأصوات الكل صوت الأحرار والمدونين وأي واحد يكتب مقال  و لا حتى ستاتي على الفايسبوك ..لين جات الثورة وطيحت هالماكينة إلي ساهمت في تواصل القمع 23 سنة خاطر برشة عباد ما وصلتهمش المعلومة وما عرفوش إلي ثما
خواتهم مضلومين و عباد يشاركوهم في نفس النضال ضد النظام الفاسد


نحب ننبهكم إلي نقرروه و لا نسكتو عليه اليوم راهو بش ينعكس علينا و على أولدنا في المستقبل. ميسالش نستحملو شوية مواقع في هالفترة الانتقالية ونعسو على اولادنا ونخممو في مصلحة بلادنا وفي ما أهم وربي يستر